តើមានវិធីអន្តរាគមន៍អ្វីខ្លះដល់អ្នកដែលមានបញ្ហាចិត្តសង្គម?
◈ រៀបចំក្រុមមនុស្ស ដែលមានបញ្ហាជាមួយគ្នា ឱ្យធ្វើការគាំទ្រគ្នាទៅវិញទៅមក ដើម្បីប្តូរបទពិសោន៍រវាងគ្នានឹងគ្នា។ គ្រួសារសហគមន៍ ត្រូវធ្វើគម្រោងព្យាបាលរយៈពេលយូរ ដើម្បីជួយដល់អ្នកជំងឺ ដូចជា៖
· ប្រសិនបើ អ្នកជំងឺមិនទាន់ទទួលបានការពិនិត្យទៅលើផ្លូវកាយ ត្រូវបញ្ជូនអ្នកជំងឺទៅកាន់មន្ទីរពេទ្យ ដើម្បីឱ្យគ្រូពេទ្យធ្វើការពិនិត្យទៅលើសុខភាពអ្នកជំងឺ។
· ត្រូវធ្វើឱ្យអ្នកជំងឺមានការជឿទុកចិត្តថា រោគសញ្ញានេះមិនមែនជាការចាប់ផ្តើមនៃជំងឺធ្ងន់ធ្ងរទេ ដោយពន្យល់ឱ្យអ្នកជំងឺទទួលស្គាល់ថា នេះជាបញ្ហាផ្លូវចិត្តបន្តិចបន្តួច។
· បង្ការអ្នកជំងឺ កុំឱ្យធ្លាក់ទៅក្នុងជំងឺចិត្តវិកលធ្ងន់ធ្ងរ ដោយផ្តល់ការព្យាបាលជាប្រចាំ។
· ការព្យាបាល អាចធ្វើឡើងតាមរយៈបុគ្គលិកសុខភាពសហគមន៍។
· គប្បីព្យាយាមបំផុត ឱ្យអ្នកជំងឺស្ម័គ្រចិត្តវិលត្រលប់ទៅធ្វើការងារដូចធម្មតាវិញ។
· ឱ្យអ្នកជំងឺហាត់ប្រាណជាប្រចាំ ហើយត្រូវមានការកំសាន្តផងដែរ។

តើនៅក្នុងសង្គមប្រជាធិបតេយ្យ ប្រជាពលរដ្ឋមានលក្ខណៈអ្វីខ្លះ?
◈ ប្រជាពលរដ្ឋនៅក្នុងសង្គមប្រជាធិបតេយ្យ ត្រូវមាន៖
ក. សិទ្ធិ
· បោះឆ្នោត និង ឈរឈ្មោះជាបេក្ខជនឱ្យគេបោះឆ្នោត
· ចូលរួមរឹបបង្កើតគណៈបក្សនយោបាយ
· ចូលរួមរឹបបង្កើតសមាគមផ្សេងៗ
· ទាមទារឱ្យរដ្ឋាភិបាលធ្វើតាមឆន្ទៈរបស់ខ្លួន

ខ. កាតព្វកិច្ច
· គោរពប្រតិបត្តិតាមរដ្ឋធម្មនុញ្ញច្បាប់នានា
· គោរពសិទ្ធិមនុស្ស និង លទ្ធិប្រជាធិបតេយ្យ
· ចូលរួមដឹងលឺ និង ចូលរួមចំណែកគ្រប់កិច្ចការរបស់រដ្ឋ

គ. ស្មារតី
· អត់ធ្មត់ អនុគ្រោះ សំរបសំរួល សហការគ្នា
· ហ៊ានបញ្ចេញមតិ ជជែកវែកញែករកខុសត្រូវ

តំបន់ពាណិជ្ជកម្មសេរីអាស៊ាន (ASEAN Free trade area) កិច្ចព្រមព្រៀងនេះ បានចុះហត្ថលេខានៅថ្ងៃខែឆ្នាំណា?
◈ តំបន់ពាណិជ្ជកម្មសេរីអាស៊ាន (ASEAN Free trade area) កិច្ចព្រមព្រៀងនេះ បានចុះហត្ថលេខានៅថ្ងៃទី ២៨ ខែ មករា ឆ្នាំ ១៩៩២ ក្នុងប្រទេសសឹង្ហបុរី។

តើស្រទាប់អូសូនមានសារៈសំខាន់សម្រាប់ផែនដីយ៉ាងណាខ្លះ?
◈ ស្រទាប់អូសូណ មានតួនាទីជាខែលក្នុងបរិយាកាសផែនដី គឺជារបាំងការពារកាំរស្មីស្វាយអ៊ុលត្រានៃព្រះអាទិត្យ បានមួយចំនួន (ចំនួន ២០%) កុំឲ្យចាំងផ្ទាល់មកលើផ្ទៃផែនដី។

តើបែបបទនៃការធ្វើកំណត់ហេតុចែកចេញជាអ្វីខ្លះ?
◈ បែបបទនៃការធ្វើកំណត់ហេតុ ចែកចេញដូចជា៖
ក- កំណត់ហេតុប្រជុំ
▪︎​ ភ្នាក់ងារដែលទទួលបន្ទុកធ្វើកំណត់ហេតុ គឺជាលេខាធិការរបស់អង្គភាព ឬ របស់គណៈកម្មការ។ បើគ្មានលេខាធិការទេ គេត្រូវចាត់តាំងសមាជិកគណៈកម្មការមួយរូប ដើម្បីធ្វើជាលេខាកត់ត្រា។
▪︎ លេខាធិការ ត្រូវកត់ត្រាឲ្យបានសព្វគ្រប់នូវខ្លឹមសារនៃកិច្ចប្រជុំ។ មតិទាំងអស់របស់សមាជិកអង្គប្រជុំ ត្រូវបានកត់ត្រាទាំងអស់ ដោយកត់ត្រាទៅតាមលំដាប់លំដោយ នៃសមាជិកអង្គប្រជុំដែលមានមតិ។
▪︎ ក្រោយពេលដែលសម័យប្រជុំត្រូ​វបានបញ្ចប់ លេខាកត់ត្រាត្រូវធ្វើសេចក្តីព្រាងនៃកំណត់ហេតុ ទៅឆ្លងប្រធានអង្គប្រជុំ ឬ ប្រធានអង្គភាព។ បន្ទាប់មកត្រូវយកសេចក្តីព្រាងកំណត់ហេតុ ដែលបានទទួលការឯកភាពពីប្រធានអង្គប្រជុំហើយ ទៅវាយកុំព្យូទ័រ។ កំណត់ហេតុត្រូវបានចុះហត្ថលេខា ដោយលេខាកត់ត្រា និង ប្រធានអង្គប្រជុំ។ កំណត់ហេតុប្រជុំ ត្រូវបានចែកជូនមន្រ្តី ដែលបានចូលរួមប្រជុំ និង អង្គភាពពាក់ព័ន្ធដើម្បីជ្រាប ឬ ដើម្បើមុខការ។
ខ- កំណត់ហេតុនៃព្រឹត្តិការណ៍ និង ការពិនិត្យកត់ត្រា
▪︎ កំណត់ហេតុត្រូវបានគេធ្វើឡើង ដោយភ្នាក់ងារម្នាក់ដែលបានឃើញព្រឹត្តិការណ៍នោះកើតឡើង។ ប្រសិនបើព្រឹត្តិការណ៍កើតឡើង នៅពេលអវត្តមាននៃភ្នាក់ងារនោះ គេត្រូវកត់ត្រាតាមសេចក្តី ដែលគេបានរាយការណ៍ជូន។

តើឱនភាពថវិកាគឺជាអ្វី? តើរដ្ឋមានមធ្យោបាយអ្វីខ្លះ ដើម្បីធ្វើហិរញ្ញប្បទានឱនភាពថវិការដ្ឋ?
◈ ឱនភាពថវិកា សំដៅទៅលើការចំណាយលើសប្រាក់ចំណូលរបស់រដ្ឋ ដែលជាសូចនាករមួយនៃសុខភាពហិរញ្ញវត្ថុ។ នៅពេលរដ្ឋាភិបាល មានឱនភាពថវិកា វានឹងបង្កើតបានជាបំណុលជាតិផងដែរ។ រដ្ឋមានមធ្យោបាយជាច្រើន ដើម្បផ្តល់ហិរញ្ញប្បទានដល់ឱនភាពថវិកា។ ប្រទេសមួយអាចខ្ចីប្រាក់ពីបរទេស (កម្ចីពីបរទេស) ឬ ក៏អាចស្វែងរកជំនួយពីបរទេស ឬ ប្រើមធ្យោបាយទាំងពីររួមគ្នា។ ដោយនិយាយតែអំពីសេដ្ឋកិច្ចក្នុងស្រុក ប្រទេសមួយ អាចអនុវត្តយកនូវវិធានការមួយចំនួន ដូចខាងក្រោម៖
▪︎ បង្កើនពន្ធ​៖ ប្រទេសមួយអាចបង្កើនចំណូលពន្ធដោយបង្កើនអត្រាពន្ធ ឬ ដាក់ចេញនូវបណ្តាប្រភេទពន្ធថ្មី។ ចំណូលដែលបានកើនឡើងអាចជួយកាត់បន្ថយ ឬ លប់បំបាត់ឱនភាពថវិកាបាន។
▪︎ ខ្ចីប្រាក់ពីសាធារណៈជន៖ រដ្ឋអាចខ្ចីប្រាក់ពីបុគ្គល គ្រួសារ សាជីវកម្ម ក្រុមហ៊ុនធានារ៉ាប់រង និង ស្ថាប័នហិរញ្ញវត្ថុដទៃទៀត តាមរយៈការបោះផ្សាយមូលបត្ររដ្ឋាភិបាលលក់ឲ្យពួកគេទាំងនោះ។ មូលបត្របោះផ្សាយដោយរដ្ឋាភិបាលរួមមាន ប័ណ្ណរតនាគាររយៈពេលខ្ចី ប័ណ្ណរតនាគាររយៈពេលមធ្យម និង សញ្ញាប័ណ្ណរតនាគារ។
▪︎ ពុម្ពប្រាក់ថ្មីបន្ថែម៖ ការបោះពុម្ពប្រាក់ថ្មីបន្ថែម នឹងបង្កើនការផ្គត់ផ្គង់រូបិយវត្ថុ ដែលនាំឲ្យអតិផរណាកើនឡើងផងដែរ។ ដូច្នេះ មធ្យោបាយនេះ មិនត្រូវបានគេយកមកប្រើឡើយ លុះ​ត្រាតែ គ្មានមធ្យោបាយផ្សេងពីនេះ ក្នុងការផ្តល់ហិរញ្ញប្បទានឱនភាព។

តើការវិភាគទៅលើការប្រែប្រួលគូរប្រជែងមានប៉ុន្មាន? អ្វីខ្លះ?
◈ ការវិភាគទៅលើការប្រែប្រួលគូប្រជែង មាន ៤ គឺ៖
ក- ការរកឃើញទីផ្សារ ដែលពាក់ព័ន្ធទៅនឹងទីផ្សារក្រុមហ៊ុន៖
· វិសាលភាពគូប្រជែង
· គោលបំណងរបស់ក្រុមហ៊ុនគូប្រជែង
· ធនធានរបស់គូប្រជែង
· សមត្ថភាពរបស់គូប្រជែង
· ចំណែកទីផ្សាររបស់គូប្រជែង
· យុទ្ធសាស្រ្តរបស់គូប្រជែង និង ជំហរទីផ្សាររបស់ពួកគេ

ខ- ការវាយតម្លៃគូប្រជែងទាំងអស់
· ភាពខ្លាំង
· ភាពខ្សោយ
· ភាពដែលអាចធ្វើការប្រកួតប្រជែងទៅបាន
· ការគ្រប់គ្រងទីផ្សារ និង ការបម្លែងសកម្មភាពរបស់ពួកគេ

គ- អង្កេតមើល ស្ថានភាពអនាគតរបស់គូប្រកួតប្រជែងទាំងអស់
· យុទ្ធសាស្រ្ត
· ប្រភពរបស់គូប្រកួតប្រជែងនីមួយៗ នាពេលអនាគត ពិនិត្យសកម្មភាពដំបូងបច្ចុប្បន្ន និង អនាគតរបស់ពួកគេ។

ឃ- ត្រួតពិនិត្យរាល់​បំលាស់ទីរបស់គូប្រជែង

តើ UNIFEM បានផ្តល់នូវអ្វីខ្លះ?
◈ UNIFEM បានផ្តល់ដោយផ្ទាល់នូវការឧបត្ថម្ភផ្នែកបច្ចេកទេស និង ហិរញ្ញវត្ថុ ទៅឲ្យគោលគំនិតចាប់ផ្តើមផ្សេងៗរបស់ស្រ្តី នៅក្នុងប្រទេសកំពុងអភិវឌ្ឍន៍។ មូលនិធិនេះ ក៏បានខិតខំអូសទាញស្រ្តីឲ្យចូលមកក្នុងដំណើរនៃផែនការអភិវឌ្ឍន៍ និង ការធ្វើសេចក្តីសម្រេចចិត្ត។ UNIFEM បានធ្វើឲ្យប្រសើរឡើង គុណសម្បត្តិនៃការរស់នៅ សម្រាប់មនុស្សទាំងអស់ដោយជួយឲ្យស្រ្តី សម្រេចបាននូវសមភាពតាមរយៈការអភិវឌ្ឍន៍សេដ្ឋកិច្ច និង សង្គម។

បើមានការសើរើធ្វើវិសោធនកម្មរដ្ឋធម្មនុញ្ញ កែប្រែរបបប្រជាធិបតេយ្យសេរីពហុបក្ស និង របបរាជានិយមអាស្រ័យរដ្ឋធម្មនុញ្ញ ស្នើឡើងដោយព្រះមហាក្សត្រ ឬ នាយករដ្ឋមន្ត្រី ឬ តំណាងរាស្ត្រ ឬ ប្រជាពលរដ្ឋ តើអាចធ្វើបានដែរឬទេ? ព្រោះអ្វី? ចូរពន្យល់។
◈ មិនអាចធ្វើបានឡើយ កាលបើប៉ះពាល់ដល់ប្រព័ន្ធប្រជាធិបតេយ្យសេរីពហុបក្ស និង របបរាជានិយមអាស្រ័យរដ្ឋធម្មនុញ្ញ។

តើការធ្វើអាជីវកម្មរ៉ែ ផ្តល់ផលប៉ះពាល់អ្វីខ្លះដល់បរិស្ថាន និង សង្គម?
ក. បរិស្ថាន
- បំពុលបរិយាកាស ទឹកលើផ្ទៃដី និង ទឹកក្នុងដី
- ការបោះបង់ដីចោល ការបំផ្លាញដីស្រទាប់មានជីជាតិ និង ធ្វើអោយខូចខាតផ្ទៃដីជាអចិន្រ្តៃយ៍។
- សំណល់រឹង
- សំណល់ធាតុវិទ្យុសកម្ម
- កំណើនកំដៅ
- ភ្លៀងអាស៊ីត

ខ. សង្គម
- ការស្រុតដី៖ បំផ្លាញអគារ ផ្លូវថ្នល់ និង ដីកសិកម្ម
- រំខានដោយសូរស័ព្ទ៖ ដោយការដាក់អោយផ្ទុះ និង ការដឹកជញ្ជូន។
- គ្រោះថ្នាក់សុខភាពមនុស្ស សត្វ និង រុក្ខជាតិ
- គ្រោះថ្នាក់ការងារ
- ការហៀបំពង់ប្រេង

តើការបិទបញ្ជីចែកចេញជាប៉ុន្មានជំហ៊ាន?
◈ ការបិទបញ្ជីចែកចេញជា ៤ ជំហ៊ាន គឺ៖
· បិទគណនីចំណូល ដោយផ្ទេរសមតុល្យខាងឥណពន្ធ ចូលទៅក្នុងគណនីកម្រៃសង្ខេបខាងឥណទាន។
· បិទគណនីចំណាយ ដោយផ្ទេរសមតុល្យខាងឥណទាន ចូលទៅក្នុងគណនីកម្រៃសង្ខេបឥណពន្ធ។
· បិទគណនីសង្ខេប ដោយផ្ទេរសមតុល្យចូលទៅក្នុងគណនីមូលធនទ្រព្យម្ចាស់។
· បិទបញ្ជីការដក់ប្រាក់របស់ថៅកែ ដោយផ្ទេរសមតុល្យឥណទាន ចូលទៅគណនីមូលធនទ្រព្យម្ចាស់ខាងឥណពន្ធ។

តើសព្វថ្ងៃនេះទស្សនវិជ្ជានៅតែជាចំណេះសកលទៀតដែររឺទេ?
◈ សព្វថ្ងៃនេះ ទស្សនវិជ្ជាលែងមានតួនាទីជាពុទ្ធិសកលទៀតហើយ ព្រោះថាស្យង់លូតលាស់ ហើយបានផ្តាច់ខ្លួនចេញផុតពីទស្សនវិជ្ជា និង មានវត្ថុសិក្សាជាក់លាក់របស់វារៀងៗខ្លួន។ ទស្សនវិជ្ជា លែងក្តោបស្យង់ដូចកាលពីមុនទៀតហើយ។ សព្វថ្ងៃ ទស្សនវិជ្ជា គ្រាន់តែមានតួនាទីជាអ្នកពិចារណា លើគុណភាពនៃគ្រប់ចំណេះ​ដឹង​ប៉ុណ្ណោះ។ មានន័យថា ស្យង់ជាអ្នកស្ថាបនា​ ទស្សនវិជ្ជាជាអ្នកជីករកឫសគល់។

តើព្រះពុទ្ធសាសនាចែកចេញជាប៉ុន្មាននិកាយ? គឺអ្វីខ្លះ? តើនិកាយទាំងនោះមានភាពខុសគ្នាដូចម្តេចខ្លះ?
◈ ព្រះពុទ្ធសាសនាចែកចេញជាពីរនិកាយ គឺ មហាយាន និង ហិនយាន។
❗️ភាពខុសគ្នារវាងនិកាយមហាយាន និង និកាយហិនយាន៖
ក.ហិនយានមានន័យថា យានតូច រទេះតូច គឺជាយានដែលនាំសត្វទៅកាន់និព្វាន។
· ហិនយានពន្យល់ថា មនុស្សត្រូវប្រាថ្នាយកអរហន្ត និងនិព្វានជាគោលដៅធំបំផុត
· ហិនយានពន្យល់ថា ធ្វើទាន ភាវនាទើបបានសម្រេចនិព្វាន
· ហិនយានសំដែងថា ខ្លួនទីពឹងខ្លួន ខ្លួនជួយខ្លួនឯង អ្នកណាធ្វើកុសសល្អ អ្នកនោះបានបុណ្យ បានរួចទុក្ខ
ខ.មហាយានមានន័យថា រទេះធំ យានធំ។
· មហាយានសំដែងថា មនុស្សត្រូវប្រាថ្នាយកពោធិសត្វដែលមានពោធិញ្ញាណជាគោលដៅ
· មហាយានសំដែងថា គ្រាន់តែជឿ និងមានចិត្តជ្រះថ្លា ចំពោះព្រះពុទ្ធក៏អាចសម្រេចបរមសុខបានដែរ
· មហាយានសំដែងថា កុសលរបស់មនុស្សម្នាក់ៗអាចជួយស្រោចស្រង់អ្នកដទៃឱ្យរួចផុតទុក្ខទោសបានដែរ
· មហាយានមានពោធិសត្តធំៗ ឬ មហាសត្វច្រើនអង្គ មិនទាន់ចូលនិព្វាន ហើយឋិតនៅក្នុងលោកនោះ ចាំជួយសង្គ្រោះ សត្វលោក។ ពោធិសត្វទាំងនោះ រួមមាន៖
១. អវលោកិតេស្វវៈ ឬ លោកកេស្វរៈ៖ អ្នកសង្គ្រោះ
២. មញ្ជុស្រី៖ អ្នកត្រួតត្រាផ្លូវយុត្តិធម៌គង់លើសីហៈ
៣. សមន្តភទ្រ៖ ថែរក្សាអ្នកកាន់សាសនា គង់លើដំរី
៤. មៃត្រេយ៖ អនាគតព្រះពុទ្ធ
៥. ក្សិតិគភ៌៖ ពោធិសត្វស្រោចស្រង់មនុស្សពីឋាននរក
៦ .វដ្របាណ៌៖ ពោធិសត្វមានវជ្រៈ គឺរន្ទះជាអាវុធ ដើម្បីការពារសាសនា
៧. ប្រាជ្ញាបារមីគា៖ មានរូបជាតួនាងទេពធីតាមួយអង្គ

កង់និយាយថា ករណីយកិច្ចកើតចេញពីចិត្តមនុស្ស គឺ “វិចារណញាណ” ចូរពន្យល់។
◈ តាមទស្សនៈកង់ច្បាប់នៃសីលវិជ្ជា ករណីយកិច្ច គឺជាច្បាប់របស់វិចារណញាណ។ ករណីយកិច្ច ចេញមកពីភាពចាំបាច់តែមួយគត់ នៃវិចារណញាណគ្មានទទួលស្គាល់បង្គាប់គោលការណ៍ាមួយ ក្រៅពីមនុស្សខ្លួនឯងឡើយ ទោះជា អាទិទេពរឺរដ្ឋមួយប្រកបដោយអំនាចក្តី។ ឧទាហរណ៍៖ អាទិទេព ច្បាប់សង្គមិនអាចបញ្ជាមនុស្សអោយធ្វើអំពើអកុសលទេ។ តើមនុស្សទាំងអស់ បានគោរពទេ? អំពើពុករលួយកើតពីអ្វី​? គឺមិ​នកើតមកពីចិត្តទេឬ?
⚡️ដូចនេះ កករណីយកិច្ច ពិតជាកើតមកពីចិត្តមនុស្សពោល គឺ វិចារណញាណ។

តើប្រាសាទណាខ្លះ ស្ថិតនៅក្នុងរចនាបថអង្គរវត្ត?
◈ ប្រាសាទ ស្ថិតនៅក្នុងរចនាបថអង្គរវត្ត កសាងនៅក្នុង ស.វ ទី ១២ មានដូចជា៖
· ប្រាសាទអង្គរវត្ត
· ប្រាសាទធម្មនន្ទ
· ប្រាសាទព្រះពិធូ
· ប្រាសាទចៅសាយទេវតា
· ប្រាសាទបន្ទាយសម្រែ
· តួប៉មខាងលើនៃប្រាសាទបាគង
· ប្រាសាទបឹងមាលា
· ប្រាសាទព្រះខ័នកំពង់ស្វាយ (ផ្នែកកណ្តាល)
· ប្រាសាទភិម៉ៃ
· ប្រាសាទបាលិល័យ្យ...។

តើផលិតផលរបស់ក្រពេញអ៊ិចសូគ្រីនជាអ្វី? តើមានរសអ្វីខ្លះ? តើផលិតផលរបស់ក្រពេញអង់ដូគ្រីនជាអ្វី?
◈ ផលិតផលរបស់ក្រពេញអ៊ិចសូគ្រីន ភាគច្រើនជារសរំលាយអាហារ។​ រសរលាយអាហារ មាន រសក្រពះ រសលំពែង រសពោះវៀន...។ ផលិតផលរបស់អង់ដូគ្រីន ជា អរម៉ូន។

មណ្ឌលរ៉ែសំខាន់ៗក្នុងប្រទេសកម្ពុជាស្ថិតនៅត្រង់ណា?
◈ មណ្ឌលរ៉ែសំខាន់ៗក្នុងប្រទេសកម្ពុជា មាន ៦ កន្លែង៖
· ​មណ្ឌលប៉ៃលិ៖ មានត្បូង
· មណ្ឌលបរកែវ៖ មានត្បូង និង មាស
· មណ្ឌលកំពង់ធំ៖ មានដែក និង មាស
· មណ្ឌលកំពត៖ មានថ្មកំបោរ និង ផូស្វាត
· មណ្ឌលពោធិ៍សាត់៖ មានថ្មកែវ
· មណ្ឌលបាត់ដំបង៖ មានថ្មកំបោរ និង ផូស្វាត

តើការទទួលបានឯករាជ្យនេះមានអត្ថន័យយ៉ាងដូចម្តេចសម្រាប់កម្ពុជា?
◈ អត្ថន័យនៃ​ការទទួលបានឯករាជ្យនេះ គឺ៖
· ប្រទេសកម្ពុជា រួចផុតពីនឹមអាណានិគមបារាំង
· ទទួលបានអធិបតេយ្យភាព បូរណភាពទឹកដី
· ប្រជាជនមានសិទ្ធិសេរីភាព ពីការកៀបសង្កត់ពីនឹមអាណានិគម
· ប្រជាជនរួចផុតពីព័ន្ធដារ
· អន្តរជាតិទទួលស្គាល់ ឯករាជ្យជាតិរបស់កម្ពុជា
· ប្រជាជនកម្ពុជា មានសិទ្ធិសម្រេចជោកវាសនារបស់ខ្លួន។

ចូរប្រៀបធៀបការធ្លាក់ទឹកចិត្តនិងការបាក់ស្បាត?
⚡️ការធ្លាក់ទឹកចិត្ត
· ប៉ះពាល់ផ្លូវអារម្មណ៍ នាំឱ្យក្រៀមក្រំបាត់បង់ភាពសប្បាយរីករាយ
· ការធ្លាក់ទឹកចិត្តច្រើនជាជំងឺរ៉ាំរៃ ជួនកាលកើតមានអូសបន្លាយអស់រយៈពេលច្រើនឆ្នាំ
⚡️ការបាក់ស្បាត
· ការប៉ះទង្គិចផ្លូវចិត្តក្នុងព្រឹត្តិការណ៍ ពោរពេញដោយក្តីរន្ធត់
· គិតមិនដល់ពីព្រឹត្តិការណ៍ដ៏ឈឺចាប់ ដែលនឹងកើតមាន
· សុបិនអាក្រក់
· មានអារម្មណ៍ភ័យភ្ញាក់ៗ
· អារម្មណ៍សោកសៅ អស់សង្ឃឹម
· អាចបណ្តាលឱ្យរាងចាលរហូត។

ចូរបង្ហាញពីមូលហេតុនិងផលវិបាកនៃសង្គមខ្មែរទៅអនាគតអំពីគ្រឿងញៀនការរំលោភសេពសន្ធវៈកុមារ ការជួយដូរមនុស្ស និង អំពើពាលាវ៉ាសែផ្សែងៗទៀត។
--- ចម្លើយ​​ ---
ក. មូលហេតុ
· គ្មានវិធានការដើម្បីទប់ស្កាត់ (អ្នកមានសម្ថកិច្ច)
· ប្រទេសយើងស្ថិតនៅជីកតំបន់ត្រីកោណមាស (កន្លែងដាំអាភៀន)
· ភាពក្រីក្រអាចឱ្យគេបណ្តាលអូសទាញមនុស្សបានតាមចិត្ត
· អំពើចាប់រំលោភ បណ្តាលមកពីការបញ្ចាំង នាំឱ្យអ្នកមើល (ក្មេងៗ) ចង់សាក់ល្បង
· ល្បែងស៊ីសងគ្រប់កន្លែង បង្កើតឱ្យមានការឆក់ប្លន់កាប់សំលាប់ជាដើម
· ដោយសារគ្រឿងញៀន ឪពុកម្តាយ អាណាព្យាបាលលែងគ្រប់គ្រង់កូនក្មួយបាន

ខ. ផលវិបាក
· គ្រឿងញៀននាំឱ្យក្មេងកើតជំងឺសរសៃប្រសាទ
· គ្រឿងញៀននាំឱ្យក្លាហាន ហ៊ានប្រព្រឹត្តអំពើបាបកម្មគ្រប់យ៉ាងដូចជាកាប់ចាក់​
· ក្មេងមិនបានចូលរៀនធម្មតា បង្កើតក្រុមបងធំ បងតូច
· រំលោភសេពសន្ធវៈចំលងជំងឺផ្សេងៗដូចជា HIV។

គ. សន្និដ្ឋាន
❗️ចំពោះវិបត្តិនេះទាំងឪពុកម្តាយ អាណាព្យាបាលនឹងអជ្ញាធរមានសមត្ថកិច្ចមិនត្រូវមើលស្រាលត្រូវមានវិធានការដាក់ទណ្ឌកម្មតាមកំរិតដែលមានចែងនៅក្នុងច្បាប់។ បើធ្វើបានដូចនេះប្រទេសយើងនិងមានមនុស្សជឿនលឿន មានមនុស្សខ្លាំងពូកែមាំមួន ក្នុងការកសាង និង ការពារមាតុភូមិកម្ពុជា នាពេលបច្ចុប្បន្នក៏ដូចជាអនាគត។

តើកិច្ចសហប្រតិបត្តិការអាស៊ីរួមមានអ្វីខ្លះ?
◈ កិច្ចសហប្រតិបត្តិការអាស៊ី រួមមាន៖
· មហាអនុតំបន់ទន្លេមេគង្គ (GMS)
· កិច្ចប្រជុំ អាស៊ី-អឺរ៉ុប (ASEM)
· កិច្ចសហប្រតិបត្តិការ អាស៊ី-ប៉ាស៊ីហ្វិក (APEC)

ហេតុអ្វីបានជាសហព័ន្ធតារាសាស្ត្រអន្តរជាតិយល់ព្រមបន្ថយចំនួនភពនៅក្នុងប្រព័ន្ធព្រះអាទិត្យមកនៅត្រឹម ៨ វិញ?
◈ បានជាសហព័ន្ធតារាសាស្ត្រអន្តរជាតិ យល់ព្រមបន្ថយចំនួនភពនៅក្នុងប្រព័ន្ធព្រះអាទិត្យ មកត្រឹម ៨ វិញ ព្រោះតាមនិយមន័យថ្មី គឺ៖
· ភពត្រូវតែធ្វើដំណើរតាមគន្លងជុំវិញព្រះអាទិត្យ (ពុំមែនជាភពរណប)
· មានម៉ាសគ្រប់គ្រាន់សម្រាប់ទំនាញរបស់វា ដើម្បីថែរក្សារាងឲ្យមូល និង មានទំហំធំល្មមក្នុងការគ្រប់គ្រងគន្លងរបស់វា។

ដូចម្តេចដែលហៅថាកំណត់ហេតុ?
◈ កំណត់ហេតុ គឺជាការកត់ត្រារបស់ភ្នាក់ងារ ១ រូប ដែលបានពិនិត្យព្រឹត្តិការណ៍អ្វីមួយ ឬ ការរៀបរាប់អំពីដំណើរប្រព្រឹត្តទៅនៃកិច្ចប្រជុំ ១ ពីដើមរហូតដល់ចប់។ ការប្រជុំដោះស្រាយទំនាស់ការប្រជុំមានលក្ខណៈសំងាត់ ការប្រជុំគណៈកម្មាធិការ និង ការប្រជុំគណៈកម្មការអ្វីមួយនៅក្នុងក្រសួង ឬ ស្ថាប័ននានាគេតែងធ្វើកំណត់ហេតុ។

តើប្រទេសកម្ពុជាមានប្រភពចំណូលថវិកាពីណាខ្លះ?
◈ កម្ពុជា មានប្រភពចំណូលធំៗ ចំនួន ៣ គឺ៖
ក. ចំណូលសារពើពន្ធ
· ពន្ធលើផលទុនប្រាក់ចំណេញ និង កម្រៃទុន៖ ពន្ធលើប្រាក់បៀវត្ស ពន្ធលើប្រាក់ចំណេញ ពន្ធលើសហគ្រាសសាធារណៈ និង ឯកជន ពន្ធលើផលទុនដីធ្លី ផ្ទះ។
· ពន្ធលើបិតិកភ័ណ្ឌ៖ ពន្ធប្រថាប់ត្រា ពន្ធផ្ទះមរតក
· ពន្ធផ្ទៃក្នុងលើទ្រព្យសម្បត្តិ និង សេវា៖ អាករលើផលរបរ អាករលើតម្លៃបន្ថែម រួមទាំងរបបនាំចូលនិងរបបផ្ទៃក្នុង។
· ពន្ធលើពាណិជ្ជកម្មក្រៅប្រទេស៖ ពន្ធគយពីការនាំចូល ពន្ធគយពីការនាំចេញ និង ការផាកពិន័យរបស់ពន្ធគយ។
· ចំណូលសារពើពន្ធផ្សេងៗ៖ ការផាកពិន័យ និង ទោសបញ្ញត្តិសារពើពន្ធ។
ខ. ចំណូលមិនមែនសារពើពន្ធ
· ផលទុននៃទ្រព្យសម្បត្តិរដ្ឋ៖ ផលនេសាទ ផលព្រៃឈើ ផលទុនបានមកពីសហគ្រាសសាធារណៈ ការជួល រោងចក្រ និង សហគ្រាស ផលទុនរបស់អាកាសចរណ៍ស៊ីវិល ការជួលសហគ្រាស។ល។
· ចំណូលពុំមែនសារពើពន្ធផ្សេងៗ៖ ផលទុនប្រៃសណីយ៍ និង ទូរគមនាគមន៍ ផលវិទ្យុ ទូរទស្សន៍ ការផ្សាយ ចំណូលនៃសេវាកម្ម​ សាធារណៈ អាករនៃស្ថានទូត ពន្ធលើអាជ្ញាប័ណ្ណនាំឈើចេញ​ ការលក់លតាបត្រ និង លិខិតបោះពុម្ពផ្សេងៗរបស់ពន្ធដារ ព្រមទាំងចំណូលពីកូតានាំចេញ។ល។
គ. ចំណូលមូលធន
· ចំណូលផ្ទៃក្នុងជាមូលធន ៖ ការលក់ទ្រព្យសម្បត្តិរដ្ឋ ដីធ្លី ផលឯកជនភាវូបនីយកម្ម ចំណូលពីការខ្ចីក្នុងប្រទេស។
· ជំនួយពីបរទេស៖ ដៃគូសហប្រតិបត្តិការទ្វេរភាគី និង ពហុភាគី។
· កម្ចីពីបរទេស៖ ដៃគូសហប្រតិបត្តិការទ្វេរភាគី និង ពហុភាគី។

តើការវិភាគទៅលើអ្នកប្រើប្រាស់មានអ្វីខ្លះ?
◈ ការវិភាគទៅលើអ្នកប្រើប្រាស់ មាន ៦ គឺ៖ Who, What, When, Where, Why, និង How។

តើ UNIFEM បង្កើតឡើងនៅឆ្នាំណា? ជាអ្វី?
◈ មូលនិធិអភិវឌ្ឍន៍អង្គការសហប្រជាជាតិ សម្រាប់ស្រ្តី (UNIFEM) បានបង្កើតឡើងនៅក្នុងឆ្នាំ ១៩៧៦។ ជាមូលនិធិស្ម័គ្រចិត្តមួយសម្រាប់ទសវត្ស អង្គការសហប្រជាជាតិសម្រាប់ស្រ្តី។ ដោយមានមូលដ្ឋាននៅទីក្រុងញូវយ៉ក និង មានការិយាល័យថ្នាក់តំ​បន់ចំនួន ១១ នៅអាស៊ីប៉ាស៊ីហ្វិក អាស៊ីខាងលិច អាហ្វ្រិក​ អាមេរិកឡាទីន និង ការ៉ាប៊ីន។ មូលនិធិនេះ បានក្លាយទៅជាអង្គការស្វ័យឯករាជ្យមួយ នៅក្នុងឆ្នាំ ១៩៨៥។

តើមាននរណាខ្លះ អាចផ្តើមធ្វើវិសោធនកម្មរដ្ឋធម្មនុញ្ញបាន? មានអ្វីធ្វើជាលិខិតតូបករណ៍នៃវិសោធនកម្មនេះ?
◈ ព្រះមហាក្សត្រ នាយករដ្ឋមន្ត្រី ប្រធានរដ្ឋសភា តាមការស្នើរបស់តំណាងរាស្ត្រ ១/៤ នៃសមាជិកសភាទាំងមូល។ ធ្វើឡើងដោយច្បាប់ធម្មនុញ្ញមួយ ដែលអនុម័តតាមមតិភាគច្រើន ២/៣ នៃសមាជិករដ្ឋសភាទាំងមូល។

ចូររាប់ឈ្មោះមណ្ឌល់រ៉ែសំខាន់ៗនៅកម្ពុជា មណ្ឌលទាំងនោះមានកំណប់រ៉ែអ្វីខ្លះ?
◈ មណ្ឌលរ៉ែសំខាន់ៗនៅកម្ពុជា មានប្រាំគឺ៖
· មណ្ឌលប៉ៃលិន៖ ត្បូងទទឹម និង កណ្តៀង
· មណ្ឌលកែវ (រតនគិរី) រ៉ែដែក (នៅភ្នំដែក) មាស (កប់ក្នុងដីល្បាប់) និង សំណ​ប៉ាហាំង (នៅជុំវិញភ្នំជី និង ភ្នំលឿង)
· មណ្ឌលកំពត និង បាត់ដំបង៖ ថ្មកំបោរ និង ផូស្វាត
· មណ្ឌលពោធិ៍សាត់៖ ថ្មកែវ (ភ្នំតាសាយ) សំរាប់រចនាជាវត្ថុសិល្បៈ។

តើជំហានខួបនៅក្នុងគណនេយ្យមានអ្វីខ្លះ?
◈ ជំហានខួបនៅក្នុងគណនេយ្យ មាន ៦ គឺ៖
· វិភាគប្រតិបត្តិការអាជីវកម្ម
· កត់ត្រាប្រតិបត្តិការទៅក្នុងទិន្នានុប្បវត្ត
· បញ្ចូលប្រតិបត្តិការទៅក្នុងសៀវភៅធំ និង រៀបចំតារាងតុល្យភាព។
· ធ្វើការកត់ត្រាកែតម្រូវគណនី និង រៀបចំតារាងតុល្យភាពកែតម្រូវ។
· បិទបញ្ជី និង រៀបចំតារាងតុល្យភាព ក្រោយការបិទបញ្ជី
· ការរៀបចំរបាយការណ៍ហិរញ្ញវត្ថុ

តើអាចនិយាយថា ទស្សនវិជ្ជាជាចំណេះទូទៅបានរឺទេ?
◈ គេអាចនិយាយថា ទស្សនវិជ្ជាជាចំណេះទូទៅបាន ព្រោះទស្សនវិជ្ជា បានក្រសោបវិជ្ជាក្នុងលោក និង ក្រៅលោកផង។ ក៏ប៉ុន្តែចំណេះទូទៅនោះ ត្រូវប្រកបដោយវិចារណញាណផង​ដែរ។